ABŞ Hərbi Hava Qüvvələri Venesuela sahillərinə yaxın ərazidə iki ədəd B-1 strateji bombardmançısını havaya qaldırıb. Uçuşlar beynəlxalq hava məkanında baş versə də, hadisə Karakas üzərində artan təzyiqin yeni mərhələsi kimi qiymətləndirilir.
Redaksiya xəbər verir ki, bu addım ABŞ-ın bir qədər əvvəl B-52 və F-35 təyyarələrinin iştirakı ilə keçirdiyi “hücum nümayişi”ndən sonra gəlib. “The Wall Street Journal” nəşrinin məlumatına görə, bu uçuşlar Prezident Nikolas Maduronun hakimiyyətinə qarşı Vaşinqtonun diplomatik və hərbi təzyiqlərinin davamı hesab olunur.
Ekspertlər bildirir ki, ABŞ-ın son əməliyyatları bölgədəki qüvvə balansını dəyişə və Karakasla Vaşinqton arasındakı münasibətləri daha da gərginləşdirə bilər. Venesuela tərəfi isə hələlik hadisə ilə bağlı rəsmi açıqlama verməyib.
