ABŞ-da gözlənilən güclü qış fırtınası ərəfəsində vətəndaşlar supermarketlərdə kütləvi alış-verişə başlayıb, nəticədə bir çox ştatda rəflər tamamilə boşalıb. Məlumatlara görə, yaxın günlərdə ölkə üzrə geniş əraziləri əhatə edəcək ekstremal hava şəraiti əhali arasında ciddi narahatlıq yaradıb.
Redaksiya xəbər verir ki, qarşıdan gələn qış fırtınasının təxminən 200 milyon insanı əhatə edəcəyi və 40 ştatda təsir göstərəcəyi gözlənilir. Texasdan Missisipiyə, eləcə də Vaşinqton şəhərinə qədər müxtəlif bölgələrdə alıcılar boş rəflərlə üzləşiblər və əsas ərzaq məhsulları sürətlə tükənib.
Missisipinin Oksford şəhərində yerləşən ərzaq mağazalarından birində çəkilən videolarda bir neçə dəhlizin tamamilə boşaldığı, süd və qablaşdırılmış içməli suyun demək olar ki, qalmadığı görünür. Eyni zamanda yumurta, kolbasa və sosiska kimi digər zəruri məhsulların da qıtlaşdığı bildirilir.
FOX Weather-in yaydığı xəbərə əsasən, sosial şəbəkələrdə paylaşılan foto və videolar ölkənin müxtəlif bölgələrində oxşar vəziyyətin yaşandığını təsdiqləyir. Vətəndaşlar həftəsonu gözlənilən sərt qış şəraitinə hazırlaşmaq məqsədilə ehtiyat toplamağa üstünlük verirlər.
