ABŞ-də istehsal olunan F-35 Lightning II qırıcılarının bir hissəsinin yeni radar sistemi olmadan təhvil verildiyi bildirilir. Məlumata görə, 2025-ci ilin iyun ayından etibarən Lockheed Martin şirkəti ABŞ-a çatdırılan F-35-lərdə yeni Northrop Grumman AN/APG-85 radarının əvəzinə balans çəkisi quraşdırır.
Redaksiya xəbər verir ki, AN/APG-85 radar sistemi hələ seriyalı istehsala tam hazır olmadığı üçün müvəqqəti olaraq təyyarələrə ballast weight yerləşdirilir. Yayılan fotoda ABŞ Dəniz Piyada Korpusuna məxsus F-35B Lightning II təyyarəsinin məhz bu balans çəkisi ilə təchiz edildiyi görünür.
Qeyd olunur ki, əvvəlki Northrop Grumman AN/APG-81 radar sistemi daha öncə istehsal olunan F-35-lərdə quraşdırılıb və hazırda ixrac edilən bütün təyyarələr həmin radar ilə təchiz edilməkdə davam edir. Bu səbəbdən ixrac versiyalarında dəyişiklik tətbiq olunmur.
Məlumata əsasən, yeni AN/APG-85 radar sistemi ilə təchiz olunmuş F-35 qırıcılarının ABŞ silahlı qüvvələrinin xidmətinə qəbuluna 2028-ci ildən başlanması gözlənilir. Ekspertlər bu keçid mərhələsinin proqramın modernləşdirilməsi çərçivəsində planlaşdırıldığını bildirirlər.
