ABŞ-nin şərq sahillərində yeni güclü qış fırtınası proqnozlaşdırılır. Meteoroloqların bildirdiyinə görə, “bomb siklonu” adlanan bu hava hadisəsi bölgəyə növbəti qar dalğasını, güclü küləkləri və kəskin hava şəraitini gətirə bilər. Gözlənilən fırtına xüsusilə nəqliyyat, enerji təminatı və gündəlik həyat üçün risklər yaradır.
Redaksiya BBC News-a istinadla xəbər verir ki, bomb siklonu atmosferdə “partlayıcı siklogenez” prosesi nəticəsində formalaşır. Bu zaman fırtınanın mərkəzində təzyiq 24 saat ərzində 24 millibar və ya daha çox azalır ki, bu da çox güclü küləklərə və intensiv qar yağışına səbəb olur.
Mütəxəssislər bildirirlər ki, bu cür sürətli təzyiq enməsi fırtınanın qısa müddətdə güclənməsinə gətirib çıxarır və hava şəraitini proqnozlaşdırmağı çətinləşdirir. Nəticədə, bəzi ərazilərdə görünüş məsafəsi kəskin azalır, yollar bağlanır və hava limanlarında ciddi gecikmələr yaşana bilər.
ABŞ-nin şərqində yaşayan əhaliyə ehtiyat tədbirləri görmək, rəsmi xəbərdarlıqları izləmək və zərurət olmadıqca səfərlərdən çəkinmək tövsiyə olunur. Aidiyyəti qurumlar isə mümkün fövqəladə hallara qarşı hazırlıq vəziyyətinə keçdiklərini açıqlayıblar.
