Biohaker Brayn Conson insanın psixoloji rahatlıq və uzunömürlülüyə gedən yolunun əsasən gündəlik seçimlərdən və stressin minimuma endirilməsindən keçdiyini bildirib.
Redaksiya mövzu ilə bağlı yayılan məlumatlara istinadla xəbər verir ki, Conson özünün X hesabında uzunömürlü insanların həyat tərzini araşdıraraq 7 əsas vərdiş müəyyənləşdirib və bunların bioloji və emosional sağlamlığı gücləndirdiyini qeyd edib.
Məlumata görə, Consonun vurğuladığı vərdişlər bunlardır:
- Hər gün eyni saatda yatmaq — yuxunun dərinliyini artırır və özünəinam hissini yüksəldir.
- Son qida qəbulunu yatmazdan 4 saat əvvəl bitirmək — orqanizmin gecə enerjisini bərpaya yönəltməsinə imkan yaradır.
- Yatmazdan 60 dəqiqə əvvəl telefon və digər cihazlardan uzaqlaşmaq — melatoninin təbii ifrazını gücləndirir və beyni sakitləşdirir.
- Yuxudan əvvəl 10 dəqiqə kitab oxumaq — gərginliyi azaldır və zehni rahatlığa kömək edir.
- Gün ərzində kifayət qədər günəş işığı almaq — bioloji ritmi sabit saxlayır, əhval-ruhiyyəni yaxşılaşdırır.
- Hər gün ən azı 20 dəqiqə fiziki hərəkət etmək — dopamin və endorfin səviyyəsini yüksəldir, zehni aktivliyi artırır.
- Günün gedişində özünə ən azı 5 faydalı addım məqsədi qoymaq — intizamı gücləndirir və insanın özünə nəzarət hissini artırır.
Mütəxəssis hesab edir ki, bu davranışlar gündəlik həyatda davamlı şəkildə tətbiq olunarsa, həm psixoloji sabitlik, həm də ümumi sağlamlıq uzun müddət qoruna bilər.
