Hindistan mediasının yaydığı məlumata görə, “Sindur əməliyyatı”ndan sonra Azərbaycan və Türkiyəyə səyahət edən hindistanlı turistlərin sayı kəskin azalıb.
Redaksiya xəbər verir ki, Hindistanın The Indian Express qəzetinin məlumatına əsasən, bu azalma xüsusilə Azərbaycanda daha kəskindir — may–avqust ayları arasında Hindistandan gələn turistlərin sayı 56 faiz azalıb. Türkiyəyə səfərlər isə 33,3 faiz aşağı düşüb.
Məlumata görə, azalma Azərbaycanın və Türkiyənin Pakistanla hərbi qarşıdurma zamanı İslamabada açıq dəstək verməsindən sonra baş verib. May ayında Azərbaycan Pakistanın mövqeyini dəstəkləyib, Türkiyə isə Pahalgam hücumu ilə bağlı beynəlxalq araşdırma tələb edən bəyanatla çıxış edib. Türkiyənin keçmişdə Pakistana silah tədarükü etdiyi də qeyd olunur.
Azərbaycan Turizm Bürosunun açıqladığı rəqəmlərə əsasən, Hindistandan gələn turistlərin sayı yanvar–aprel dövründə ötən illə müqayisədə 33 faiz artmışdı, lakin sonrakı dörd ayda 56 faizlik azalma qeydə alındı.
Hər iki ölkə son illər Hindistanlı səyahətçilər arasında getdikcə populyarlaşırdı, buna Bakı və İstanbula birbaşa reyslərin açılması və Türkiyənin digər istiqamətlər üçün tranzit mərkəzinə çevrilməsi şərait yaratmışdı.
Lakin may ayından etibarən Hindistanın Pakistanla atəşkəs razılaşmasından və sosial mediada Türkiyə ilə Azərbaycanın boykot çağırışlarından sonra rezervasiyalarda ciddi azalma müşahidə olunub. MakeMyTrip şirkətinin nümayəndəsi Reuters agentliyinə bildirib ki, “Azərbaycan və Türkiyə üçün bronlar 60 faiz azalıb, ləğvlərin sayı isə eyni dövrdə 250 faiz artıb.”
EaseMyTrip şirkətinin baş direktoru Rikant Pittie əlavə edib ki, səyahətçilər planlarını Gürcüstan, Serbiya, Yunanıstan, Tailand və Vyetnama yönləndirirlər. “Türkiyə üzrə 22 faiz, Azərbaycan üzrə isə 30 faiz ləğv qeydə almışıq,” – deyə o qeyd edib.
Visa emal platforması Atlys də Türkiyə və Azərbaycana viza müraciətlərinin 42 faiz azaldığını təsdiqləyib.
