İstanbulun Florya sahilləri yaxınlığında Azərbaycan və Türkiyə bayraqları altında üzən iki tanker toqquşub. Hadisə sahilə yaxın ərazidə qeydə alınıb və dənizdə hərəkətə qısa müddətli maneələr yaranıb.
Redaksiya xəbər verir ki, toqquşan tankerlərdən biri Azərbaycan bayraqlı “Kəlbəcər”, digəri isə Türkiyə bayraqlı gəmi olub. İlkin məlumatlara görə, hadisə nəticəsində ciddi xəsarət və ya ekoloji təhlükə barədə məlumat verilməyib.
Hadisə barədə məlumat daxil olduqdan sonra aidiyyəti qurumların müvafiq xilasetmə və nəzarət qrupları əraziyə cəlb edilib. Gəmilərin texniki vəziyyəti və toqquşmanın səbəbləri araşdırılır.
Hazırda insidentlə bağlı araşdırma aparılır və əlavə məlumatların açıqlanacağı gözlənilir. Rəsmi qurumlar dənizdə təhlükəsizlik tədbirlərinin gücləndirildiyini bildiriblər.
