Sinema Sənətləri və Elmləri Akademiyası Akademiya Mükafatlarının yayım formatında tarixi dəyişiklik etdiyini açıqlayıb. Qərara əsasən, Oscar mükafatlandırma mərasimləri müəyyən dövrdən etibarən ənənəvi televiziya yayımlarından imtina edəcək.
Redaksiya xəbər verir ki, 2029–2033-cü illər ərzində Oscar mərasimləri tamamilə YouTube platforması üzərindən yayımlanacaq. Bildirilir ki, 2028-ci ildə keçiriləcək yüzüncü Akademiya Mükafatları mərasimi ABC kanalında efirə gedəcək və bu, televiziya vasitəsilə yayımlanan son Oscar mərasimi olacaq.
Yeni razılaşma çərçivəsində yalnız mükafat mərasimləri deyil, həm də Akademiyanın 52 milyon materialdan ibarət geniş arxivi mərhələli şəkildə rəqəmsal istifadəyə açılacaq. Akademiya bu addımın dünya üzrə tamaşaçı əhatəsini genişləndirməyi hədəflədiyini vurğulayıb.
Eyni zamanda, qarşıdakı Oscar mərasimi üçün qısa siyahıya düşən filmlər də açıqlanıb. Fələstinli rejissor Annemarie Jacirin çəkdiyi və TRT-nin ortaq istehsalı olan “Palestine 36” filmi “Ən yaxşı beynəlxalq film” nominasiyası üzrə son on beşliyə daxil edilib.
