Waymo şirkəti avtopilot sistemlərinin təlimi üçün Google Genie 3 bazasında hazırlanmış dünya modelini elan edib. Waymo World Model adlandırılan bu sistem real avtomobilləri və insanları riskə atmadan avtonom idarəetmə alqoritmlərinin təkmilləşdirilməsini hədəfləyir və sonsuz simulyasiya mühiti yaradır.
Redaksiya mənbəyə istinadən xəbər verir ki, Waymo World Model mühəndislərə mətn sorğuları vasitəsilə hava şəraitini, günün vaxtını dəyişməyə və ya sıfırdan yeni yol vəziyyətləri yaratmağa imkan verir. Sistem adi videoregistrator görüntülərini interaktiv 3D mühitə çevirərək onu real vaxtda redaktə etməyə şərait yaradır.
Layihənin əsas məqsədi “nadir hadisələr” adlandırılan ssenarilərin sınaqdan keçirilməsidir. Bunlar real həyatda çox nadir hallarda baş verən, lakin robot sistemlərin məntiqini ciddi şəkildə poza bilən hallardır. Waymo misal olaraq magistral yola çıxan fil, tornado təqibi və ya tropik şəhərdə qar yağması kimi qeyri-adi vəziyyətləri göstərir. Şirkət bildirir ki, bu cür halları canlı şəhər mühitində təhlükəsiz şəkildə test etmək mümkün deyil, lakin sistemlərin bu ssenarilərə hazır olması vacibdir.
Mövzu həm də son dövrdə Kaliforniyada robotaksinin uşağa toxunması ilə bağlı insident fonunda aktuallaşıb. Hazırda mürəkkəb vəziyyətlərdə avtomobillərə operatorlar yardım edir, lakin onlar birbaşa idarəetmə həyata keçirmir, yalnız istiqamətləndirici göstərişlər verirlər. Şirkət insan faktorunu minimuma endirərək real muxtariyyət səviyyəsini artırmağı planlaşdırır.
Dünya modelləri ətrafında maraq sürətlə artır. İnvestorlar və süni intellekt sahəsində tanınmış simalar, o cümlədən Yan Lekun və Fey-Fey Li, bu yanaşmanı böyük dil modellərindən sonra növbəti mühüm mərhələ kimi qiymətləndirirlər. Project Genie layihəsinin son pre-relizi artıq onlarla tərtibatçını süni intellektin fizika və məkan anlayışını dərinləşdirməyə yönəlmiş eksperimentlərə sövq edib.
