Yunanıstanda aviasiya hərəkəti bazar günü səhər saatlarında texniki nasazlıq səbəbindən ciddi şəkildə pozulub. Afina Uçuş Məlumat Regionunda yaranan problem nəticəsində ölkə üzrə bütün uçuşların yola düşməsi müvəqqəti olaraq dayandırılıb, paytaxt Afina və regional hava limanlarına enişlərə isə məhdudiyyətlər tətbiq edilib.
Redaksiya mənbəyə istinadən xəbər verir ki, nasazlıq hava hərəkətinin idarə olunması mərkəzlərində radio tezlik sistemləri ilə əlaqəlidir. Təhlükəsizlik məqsədilə artıq havada olan təyyarələrin normal şəkildə enməsinə icazə verilib, lakin yeni uçuşların həyata keçirilməsi dayandırılıb.
Məlumata görə, yaranmış texniki problem aviasiya təhlükəsizliyinə birbaşa risk yaratmasa da, ehtiyat tədbiri kimi bütün uçuş əməliyyatları müvəqqəti olaraq məhdudlaşdırılıb. Sərnişinlərə hava limanlarında əlavə gözləmələr və gecikmələr barədə məlumat verilib.
Rəsmi qurumlar nasazlığın aradan qaldırılması istiqamətində işlərin davam etdiyini bildirib. Problemin tam həllindən sonra uçuşların mərhələli şəkildə bərpa ediləcəyi gözlənilir.
